Quishing (QR-kode-svindel)
Quishing, eller QR-kode-svindel, blir stadig meir vanleg. Svindlarane får deg til å skanne ein QR-kode, som sender deg til nettside laga for å lure deg til å gi frå deg sensitiv informasjon.
Quishing (QR-kode-svindel)
Kva er ein QR-kode?
QR-kode er forkorting for «quick response». Du finn QR-kodar nesten overalt – frå kafear og restaurantar, til reklameplakatar og e-postar. QR-koden ser gjerne ut som ein firkanta strekkode. Du skannar QR-koden med mobilkameraet ditt, og så blir det vanlegvis vist ein nettsidelink. Viss du trykker på den, kan du til dømes bestille mat eller laste ned ein app.
Kva er quishing?
Quishing, eller QR-kode-svindel, er ein svindelmetode der svindlarane bruker QR-kodar til å lure deg. Svindlarane får deg inn på nettside laga for å samle informasjon dei kan misbruke, som til dømes:
- Fødselsnummer
- BankID-passord
- Kortnummer
- PIN-koder
Nettsidene kan også brukast til å spreie skadeleg programvare.
QR-kodar er enkle å lage, så kven som helst kan spreie dei via til dømes e-post, klistremerker eller brev i posten. Kodane kan også verke heilt uskuldige, som til dømes tilgong til ein meny på restaurant eller tilgang til ein gunstig rabatt.
Slik unngår du å bli lurt
QR-kodar har gjort veldig mange ting enklare i kvardagen, men som all annan teknologi kan den misbrukast. Ved å ta nokre enkle forholdsreglar, kan du enkelt redusere faren for å bli lurt.
- Dobbeltsjekk alltid nettadressa du hamnar på etter å ha skanna ein QR-kode.
- Får du ein QR-kode via e-post eller post, bør du forsikre deg om at avsendaren er påliteleg og at nettsida koden peikar til er sikker.
- Bruker du QR-kode til betaling bør du bruke QR-kode-skanneren til Vipps. Den vil varsle deg viss det er noko mistenkeleg med QR-koden.
- Ver forsiktig med å bruke QR-kode til å laste ned apper – det er alltid best å bruke telefonen sin offisielle app-butikk, som til dømes App Store eller Google Play.
- Skal du skanne ein QR-kode, sjekk om nokon kan ha tukla med han. Svindlarane kan til dømes finne på å klistre eit klistremerke med ein annan QR-kode oppå den originale koden.
