Fakturasvindel
Fakturasvindel er eit svindelforsøk der du blir lurt til å betale ein falsk faktura, som verkar ekte. Denne typen svindel utnyttar folk sin tillit til veletablerte selskap eller anerkjente leverandørar.
Kjenneteikn
Det kan vere vanskeleg å skilje ein falsk faktura frå ein ekte, då svindlarane ofte etterliknar ekte fakturaer til minste detalj med korrekt selskapsnamn og logo. Betalingsinformasjonen kan verke riktig, men svindlarane prøver å lure deg til å betale inn beløpet til sitt eige kontonummer.
Typiske kjenneteikn:
- Du får ei rekning for noko du ikkje har bestilt eller mottatt.
- Du får ein e-post som seier at det er problem med faktureringa, og ber deg om å oppdatere betalingsinformasjonen med ein gong.
- Du blir informert om at du har betalt ei rekning to gonger, og blir bedt om å logge inn på ei (falsk) nettside for å få tilbake pengane.
- Du får beskjed om at det manglar informasjon om deg for å kunne betale rekninga di. Du blir bedt om å logge inn i ei falsk betalingsløype og betale innan kort tid.
- Du blir varsla om at mobilabonnementet ditt vil bli avslutta. Svindelen går ut på at du må rette opp ein feil innan kort tid for å behalde abonnementet ditt.
- Denne typen svindel kan ramme både enkeltpersonar og bedrifter.
Slik unngår du å bli lurt
For å unngå å bli lurt er det viktig å vere på vakt kvar gong du får ei rekning. Her er nokre nyttige tips for å verne deg sjølv:
- Dobbeltsjekk alltid fakturaer nøye. Sjå etter feil, som feilaktig beløp eller selskapsnamn. Har du mottatt fakturaer frå same bedrift tidlegare bør du sjekke om kontonummeret har blitt endra.
- Viss du får to fakturaer for det same beløpet kort tid etter kvarandre, sjå etter kva som skil dei to fakturaene frå kvarandre. Ta kontakt med leverandøren for å bekrefte at endringa stemmer. Dette bør du gjere på ein annan kanal enn der du fekk fakturaen.
- Ver forsiktig med å gi ut personleg eller bedriftsinformasjon til ukjente kjelder.
- Bruk sikre betalingsmetodar og sjekk bankinformasjonen nøye før du betaler.
- Stadfest alltid med riktig person eller avdeling viss du er usikker på ein faktura.
- Ei bedrift bør òg vurdere å innføre dobbel godkjenning av betalingar i nettbanken. Då sikrar ein at betalingane er kontrollerte av to tilsette før beløpet går til utbetaling.
- Ferietid er høgsesong for fakturasvindel retta mot bedrifter! Dersom du får ein faktura du er usikker på, ikkje godkjenn for å "få den unna", men bruk tid på å sjekka den opp. Frå bedrifta si side er det viktig med grundig opplæring og rutinar for fakturering.
Har du allereie betalt fakturaen?
- Ta kontakt med banken og politiet så raskt som mogleg! Handlar du raskt, kan vi kanskje stoppe overføringa.
