Direktørsvindel
Direktørsvindel, også kalla CEO-svindel, inneber at ein tilsett blir lurt til å betale ein falsk faktura eller overføre pengar frå kontoen til bedrifta.
Kjenneteikn
Metoden baserer seg ofte på sosial manipulering og grundig forarbeid. Svindlarane har ofte lært seg språket de bruker på arbeidsplassen og plukka opp intern informasjon. Dette bruker dei for å verke profesjonelle.
- Ein leiar, forretningspartner eller ein annan du til vanleg ikkje har direkte kontakt med, sender deg ein e-post eller ringer deg uventa.
- Du blir bedt om å betale ein faktura eller overføre pengar. Ofte til eit utanlandsk kontonummer.
- Personen ber om konfidensialitet. Det kan grunngivast med ein hemmeleg forretningsavtale, oppkjøp eller liknande.
- Du får beskjed om at det hastar.
- Du blir trua, smigra, eller får løfter om belønning.
- Du føler at førespurnaden er uvanleg, at dette skil seg frå rutinane til bedrifta.
Slik unngår du å bli lurt
For å unngå å bli lurt er det viktig å vere på vakt. Her er nokre nyttige tips for å verne bedrifta di:
- Vêr forsiktig med å gi ut personleg informasjon eller bedriftsinformasjon til folk du ikkje kjenner.
- Bruk sikre betalingsmetodar og sjekk bankinformasjonen nøye før du betaler.
- Stadfest alltid med ein fagperson eller -avdeling på arbeidsplassen din, dersom du er usikker. Dette bør du gjere gjennom ein annan kanal enn der du fekk førespurnaden.
- Innfør dobbel godkjenning av betalingar i nettbanken. Då sikrar du at betalingane er kontrollerte av to tilsette før beløpet går til utbetaling.
- Innfør grundig opplæring og rutinar for betalingar og overføringar.
Er overføringa eller betalinga allereie gjennomført?
Ta kontakt med banken og politiet så raskt som mogleg! Handlar du raskt, kan vi kanskje stoppe overføringa.
