Kor kjem pengane frå?

Mange barn trur at bankkort er ei utømmeleg kjelde til pengar. Med lommepengar kan dei lære kvar pengane kjem frå.

Erfaringa vår er at det kan vere like vanskeleg for foreldre å lære bort sunn økonomi, som det er å få barn til å forstå det. Ein måte å forklare kvar pengane kjem frå er å snakka om lønn, fortel at det er pengar de har jobba for få. For å gjere lønn forståeleg kan det å gi ein fast sum lommepengar for avtalte oppgåver vera ein god ide.

- Poenget med å gi lommepengar mot yting er å lære barna at det ligg jobb bak kvar krone. På den måten får pengar ein verdi, og dei ser kva som må til for å tene pengar, seier Magne Gundersen, forbrukarøkonom i SpareBank 1.

Ifølgje Gundersen er det opp til kvar enkelt familie å bestemme kor mykje og kor ofte det bør givast lommepengar, men det bør vere klart for barna kva det blir gitt lommepengar for og kva dei skal brukast til.

- Alternativet til lommepengar er å gi barna pengar når dei treng det. Faren med det er at ein lærer barna å mase om pengar, og får dei alltid ja vil dei få ei oppfatning om at mor og far er ein uavgrensa tilgang til pengar, seier Gundersen.

Gundersen meiner at ved å gi ein fast sum lommepengar og bruka det bevisst gir det ei fin moglegheit til å snakke om det å bruke pengar, og barna vil sjølv erfare at dei må gjere ein liten innsats for å få pengar.