Pengemuldyr
Har du blitt spurt om du kan ta imot pengar på kontoen din og vidaresende til nokon andre, mot at du får litt betalt for bryet? Då prøver truleg ein kriminell å bruke deg som pengemuldyr.
Slik prøver dei å lure deg til å bli pengemuldyr
Eit pengemuldyr er ein person som får pengar frå éin person og overfører dei vidare til ein annan – mot betaling. Pengemuldyr gjer det mogleg for å kvitvaske pengar frå kriminell aktivitet.
Kriminelle bruker ulike metodar for å rekruttere muldyr. Typiske kanalar er sosiale medium, direktemeldingsappar, e-post og annonsar på nett, men dei kan også ta kontakt ansikt til ansikt.
Dei kriminelle siktar seg særleg inn på unge, arbeidslause, studentar, personar med økonomiske problem, og folk som er nye i landet. Mange, særleg unge, blir lurt til å vere pengemuldyr utan at dei veit at dei gjer noko ulovleg. Deit å vere pengemuldyr er ei kriminell handling og ein kan reknast som medverkande viss ein bidrar til dette.
Faresignal du kan sjå etter
- Ein framand tar personleg kontakt og ber deg overføre pengar via bankkontoen din mot betaling.
- Det blir framstilt som ei risikofri moglegheit for lettjente pengar.
- Du får vite kor mykje andre har tent på å gjere det same.
- Dei ber om kontonummeret ditt, eller dei ber deg opne ein ny konto.
- Det er eit utanlandsk selskap som annonserer etter «lokale agentar».
- Avsendaren bruker ei gratis e-postteneste (som Gmail), og adressa stemmer ikkje overeins med namnet på selskapet.
- Språket er dårleg, med grammatiske feil.
- All kommunikasjon om jobben føregår over nettet.
Døme på direktemelding
«Hei! Kontoen min fungerer ikkje, kan ein kompis overføre 10.000 til deg, og så sender du dei vidare? Du får 500 kroner som takk for hjelpa!».
Verving til å bli pengemuldyr kan sjå ut som ein liten, uskuldig venneteneste. Iblant veit ikkje eingong dei som kontaktar deg kva dei er med på, for dei er berre endå ein mellommann som har blitt lurt.
Hugs: Med ein gong nokon ber deg få pengar med formål å flytte dei, bør varsellampene blinke.
Slik unngår du å bli lurt
- Aldri oppgi kontoopplysningane dine til nokon du ikkje kjenner eller stoler på.
- Aldri opne ein bankkonto fordi nokon du akkurat har møtt ber deg om det.
- Undersøk alltid litt rundt selskap eller personar som tilbyr deg jobb.
- Takk nei til tilbod om lettente pengar.
- Viss noko verkar for godt til å vere sant, er det sannsynlegvis det.
Dette gjer du om du har blitt lurt
Viss du innser at du har blitt verva som pengemuldyr, gjer du følgjande:
- Stopp pengeoverføringane umiddelbart.
- Kontakt oss på +47 57 82 97 00 viss du har kontoen hos oss.
- Meld frå til politiet.
- Meld frå til nettenesta du blei kontakta på, viss du blei rekruttert via sosiale medium.
