Årets summer interns i
SpareBank 1 Forvaltning og ODIN
Sommaren er her, og tradisjon tru tar vi imot flinke studentar til Summer internship i SpareBank 1 Forvaltning og ODIN.
Årets summer interns i
I år har vi seks summer interns i konsernet. I ODIN jobbar Andrea Engelstad (NTNU indøk), Elias Braut (NHH) og Viktor Græe (NHH). I SpareBank 1 Forvaltning jobbar Hedda Lauritzsen (NHH), Hans Kristian Bjørgo Kværum (NTNU indøk) og Nikolai Riiber (Saint Michael's College i Vermont).
I sommar skal årets interns jobbe med ESG-analyser og rapportering på porteføljenivå. Målet er å gje eit inntrykk av finansierte klimagassutslepp og ESG risiko på tvers av fond, sektorar og land.
Forvaltning og berekraftsanalysar
Andrea, Elias og Viktor jobbar med selskapsanalysar i forvaltningsavdelinga i ODIN Forvaltning, og har allereie komme godt i gang med arbeidet. Dei er alle interesserte i aksjeanalyse og opplever å ha komme til riktig stad.
– Internship i ODIN er midt i blinken for alle som er interessert i analyse av aksjar. Her får eg jobba med hobbyen min. Derfor diggar eg å vere intern her, og eg gleder meg til å gå på jobb kvar dag! Kollegaene er engasjerte og brenn for jobben og arbeidsmiljøet er hyggeleg, seier Andrea Engelstad, som har ein plan om å jobbe som aksjeanalytikar i framtida.
Foto: Viktor Græe (NHH), Andrea Engelstad (NTNU indøk) og Elias Braut (NHH).
Foto: Hedda Lauritzsen (NHH), Nikolai Riiber (Saint Michael's College i Vermont) og Hans Kristian Bjørgo Kværum (NTNU indøk).
Hedda, Hans Kristian og Nicolai jobbar med å bygge ein datamodell og lage analysar av klimagassutslepp og ESG-risiko i porteføljane. Resultatet av arbeidet skal brukast til berekraftsrapportering, og dessutan inn i SpareBank 1 Forvaltning sitt strategiarbeid. Dei skal også utvikle interaktive rapportar som kan brukast til målstyring og til kunderapportering.
Nyleg var Hedda, Hans Kristian og Nicolai i Trondheim der dei fekk treffe forvaltarar i SpareBank 1 Forvaltning og dessutan representantar frå leiinga i SpareBank 1 SMN og Sparebankstiftelsen SMN.
– Vi har hatt ein lærerik start med tur til Trondheim og introduksjon til eit spennande oppdrag. Vi har fått verdifull innsikt i ESG-data, lært mykje om Sparebank 1-alliansen, og fått djupare forståing for forvaltning. Vi har komme godt i gang med arbeidet, seier Nikolai Riiber.
Tidenes høgaste søkartal
Talet på søknader til årets summer internship i ODIN og SpareBank 1 Forvaltning var rekordhøgt, og det var ein utfordrande utveljingsprosess med så mange høgt kvalifiserte søkarar. Administrerande direktør Ronni Møller Pettersen i SpareBank 1 Forvaltning er glad for dei høge søkartala.
– Det er svært gledeleg at såpass mange og kloke studentar ønsker å vere med på å løyse oppdraget vårt: Å auke sparinga i samfunnet. Erfaringa vår er at summer interns løyser viktige oppgåver for oss, samtidig som vi set stor pris på kompetansen og nytenkinga dei bringer med seg. Vi gleder oss over at årets seks summer interns endeleg er på plass.
Robin Øvrebø, forvaltar i ODIN Forvaltning seier seg samd.
– Det er alltid gøy å jobbe med unge, nysgjerrige og flinke folk. Dei kjem med gode og positive bidrag, både på prosjekt og gjennomgang av selskap. Samtidig stiller dei spørsmåla som gjer at vi også må stoppe opp, tenke og reflektere litt. Det er alltid nyttig. Ikkje minst er det også hyggelege og trivelege personar å jobbe saman med.
Foto: Ronni Møller Pettersen, Administrerande direktør i SpareBank 1 Forvaltning.