SpareBank 1 Kreditt

Tilpasningsdyktige kundar i strammare tider

Korleis har norske forbrukarar handtert tida med høgare prisar og stigande renter? Held dei oppe forbruket gjennom betalingsutsettingar, auka kredittgrense på kredittkortet sitt og nye forbrukslån, eller lyttar dei til råda om å bruke mindre og vere meir forsiktig?

Noko av svaret kan vi finne i etterspørselen etter ny kreditt.

På den eine sida har kredittkorta våre sett omsetningsrekordar og opplevd volumvekst. På den andre sida ser vi at søknadsmengda hadde toppen sin på sommaren både for kredittkort og forbrukslån, og har falle noko tilbake sidan.

At kredittkortet har i stadig større grad blitt eit betalingskort for mange, har for oss som jobbar med usikra kreditt blitt meir og meir tydeleg. Aukande omsetning er derfor ikkje eit teikn i seg sjølv på at norske hushald har dårlegare råd. Tvert imot ser vi at fleire av kundane våre tar grep om eigen økonomi og gjer opp for seg i tide, stikk i strid med bildet som av og til blir teikna i media. Vi ser rett nok ein auke i lån som går til inkasso og blir mislegheldt, men det er framleis låge nivå samanlikna med historisk misleghald.

Berre i 2023 hjelpte vi over 30.000 Sparebank 1-kundar med å redusere sine lånekostnadar ved å samle forbruksgjelda deira til betre vilkår. Refinansiering har vore eit satsingsområde for oss, og det ber no frukter, både for oss og kundane.

Likevel må også vi som kredittselskap omstille oss i møte med dyrare tider. Ikkje nokon stad er dette så tydeleg som for kredittkorta. Når kredittkortkundane bruker kortet, får dei som kjent inntil 45 dagar rentefri betalingsutsetting på beløpet dei låner. Vi som må legge ut desse pengane, har likevel ikkje nokon rentefri periode, vi må sjølv låne dei. Desse finansieringskostnadane har blitt mykje høgare det siste året, naturlegvis i tråd med auka rentenivå generelt. Faktisk er dei over 3 gonger nivået for få år sidan. Kombinerer vi dei høgare finansieringskostnadane med at ikkje-renteberande omsetning er på rekordnivå og no òg utgjer ein større del av kredittporteføljen enn før, får du i sum betydeleg lågare lønnsemd for kredittkortet som produkt. Dette treffer både oss og konkurrentane våre.

Nokon av grepa vi tok gjennom året for å auke lønnsemda, var å heve renta for nedbetalingslåna våre i tråd med marknadsutviklinga, og justere vilkåra på Pengar tilbake, cashback-tilbodet i kredittkortet.

Viktigare i det lange perspektivet er nok likevel kva vi i 2023 gjorde for å førebu grunnen til å bli Norges største kredittpartnar innan 2030. I februar kunne vi endeleg ønske Coop velkommen om bord som partnar, og vi tilbyr no kredittkort og refinansieringslån til Coop sine mange medlemmer over heile landet. Vi har også gjort fleire store IKT-løft som gjer oss betre rusta for framtida.

Særleg 27. oktober 2023 verkar for meg som ein merkedag og eit verkeleg høgdepunkt frå året. Då gjekk søknaden til Finanstilsynet der dei to største sparebankalliansane i landet, SpareBank 1 og Eika, ber om å få slå kreftene sine saman på kredittområdet. Går det slik vi håper, vil vi i løpet av 2024 etablere eit felles selskap der vi får utnytta den samla styrken vår og innsikt til det beste for kundane. Ved samanslåing vil over ein million nordmenn vere kundar av det nye selskapet, og vi har tru på at vi gjennom å sameine kreftene våre kan tiltrekke oss endå fleire partnarar som harmonerer med verdigrunnlaget til sparebankane i Norge.

Vi opererer i ein marknad med stor internasjonal konkurranse, og forhåpentlegvis vil vi med dette kunne hente endå fleire kundar «heim» til sparebankane.

Uansett kva framtida bringar, jobbar vi ufortrødent vidare for framleis vekst innan både nedbetalingslån og kredittkort, gjennom å gje både partnarar og kundar førsteklasses opplevingar og god og trygg rådgjeving. Det er slik vi blir ein ansvarleg vinnar i marknaden. Eg vil takke for tilliten i året som gjekk – vi går ei spennande tid i møte.

Ronny Remen Smolan, administrerande direktør