SpareBank 1 Sogn og Fjordane har merka ei auke i ein ny type svindel som for alvor breidde om seg i 2024.
– Svindlarane ringer til kunden og latar som dei jobbar hos banken. Dei fortel at kunden er hacka, og tilbyr seg å hjelpe kunden med å flytte pengane over til noko som dei kallar «ein sikker konto». Kunden, som trur pengane deira er i fare, gjer som svindlaren seier, fortel leiar for økonomisk kriminalitet, Ole Martin Eide.
Eit godt råd
Eide har eit soleklart råd om du får ein slik førespurnad.
– Vi vil aldri be deg flytte pengane dine på denne måten, eller tilby oss å gjere det for deg. Får du ein slik førespurnad skal du berre legge på røret, fortel Eide, og understrekar:
– Banken, politiet eller andre offentlege eller kjente aktørar vil aldri be deg om å opplyse påloggingsinformasjon eller be deg som kunde overføre pengar til andre kontoar, fortel han.
Ein av mange typar
Eide fortel at «sikker konto» berre er ein av mange ulike svindelforsøk som verserer der ute. Svindel via lenke frå "Autopass", "helt hjem" og Facebook er andre svindelmetodar som også går igjen.
– Svindlarane har mange metodar for å forsøke å lure oss. Ein god hugseregel er stopp, tenk, sjekk. Framstår eit tilbod for godt til å vere sant, er det ofte svindel. Ver kritisk til lenker i SMS eller e-post der du blir bede om å logge inn med BankID, og aldri invester pengar via lenke på e-post, FB eller andre sosiale medier, rådar han til.
Han gler seg over at kundane er årvåkne og følger med.
– Mange som kontaktar oss har ikkje gått på svindel, men tipsar oss om forsøket, seier han.
For meir info: Ta kontakt med kommunikasjonsdirektør, Johanne Viken Sandnes, tlf: 959 21 208, johanne.sandnes@ssf.no