Den 4. november blir Sparebanken Sogn og Fjordane til SpareBank1 Sogn og Fjordane. I det siste ser banken at det florerer fleire svindelforsøk som prøvar å utnytte skiftet til banken ved å sende meldingar frå «SpareBank 1» og banken, der svindlarane fiskar etter personleg informasjon frå kundane.
– Vi oppmodar alle kundane våre om å vere ekstra på vakt i tida framover, og spesielt i ei tid der de får mykje informasjon frå oss om endringar. Hugs at vi i banken ikkje sender lenke til innlogging på SMS eller e-post der du skal legge inn kontaktinformasjon og passord. Digital informasjon kan lett forfalskast. Ver kritisk og vurder innhald nøye. Vi vil aldri heller ringe dykk som kundar og be om sensitiv informasjon, som BankID, kodar eller passord, fortel Ole Martin Eide, som jobbar som leiar for økonomisk kriminalitet i banken.
Grunnen til at banken veit om auken er fordi kundane gir beskjed om forsøket.
– Vi ser med glede at kundane våre er årvakne. Dei ignorerer meldinga, og gir oss beskjed om kva som har skjedd. Vi opplever at kundane våre har blitt gode til å tenke kritisk gjennom meldingar og telefonardei får, og det er veldig viktig å gjere nettopp dette, seier Eide og utdjupar:
– Det er ikkje første gong og ikkje siste gong banken sitt namn blir misbrukt i svindelforsøk. Svindlarane er gode til å finne relevante knaggar. Dei er til dømes aktive som «Skatteetaten» ved skattetider og som «posten» rundt jul. No ser dei at det skjer noko i banken i samband med overgangen til SpareBank 1 og hiv seg derfor rundt for å sende svindelforsøk i regionen vår, fordi dei veit det er mange kundar av oss som bur her.
Eide trekk fram kunnskap som det viktigaste våpenet mot svindel.
– Vi går stadig ut med informasjon om aktuelle svindelforsøk fordi vi ønsker å styrke bevisstheita til folk endå meir om at svindelforsøk dessverre er ein del av kvardagen. Er forbrukarane bevisst på nettopp dette, så er dei betre rusta til å kjenne igjen eit svindelforsøk når dei blir utsett for det, seier Eide.
Om kunden er usikker på om informasjon frå banken er svindel eller ei, ber han kunden kontakte kundesenteret i banken.
– Og, om nokon frykter dei har blitt svindla, kontakt oss snarast, seier han.
For meir info, kontakt
Kommunikasjonsdirektør, Johanne Viken Sandnes, tlf: 959 21 208, johanne.sandnes@ssf.no